wróćo k přehladej

15.06.2008

Skónčnje je tak daloko!

Literarny konopej přeproša na swoje prěnje čitanje, a to w najkrótšej nocy lěta – mjenujmy ju „swjatojansku nóc“. Mjez hatom a Brězanec łuku, „ze žabjacym koncertom a rejku soninow w kuzłokrasnej lětnjej nocy“ wočakuja was nowosće literarneho dorosta kaž tež překwapjenki Brězana, serbskeje erotiki – a snano tež kriminalki?

Budźće sobotu, 21.06.2008 w 20.30 hodź. w Hornim Hajnku na Budarjec łuce, hdźež so naše literarne pućowanje započina. Štóž ma, njech přinjese přikryw a kapsnu lampu sobu – tam je mjenujcy ćma kaž w pjecy.

Hač dotal su planowane čitanja na třoch městnach. Přinjesće na kóždy pad tež waše nowe twórby sobu a zmužće so, je tam přečitać! Što měniće? Štó z was ma lóšt, tam čitać? Hač lyriku, krótkoprozu abo samo mału scenu – napišće nam hač do srjedy 18.6. mailku na .

Hač do soboty na literarnym konopeju
strowi Madleńka Šołćic