10.07.2011
Erotiska premjera połny wuspěch
„Zady našoh kompeja abo Hdyž so kachle čumpaja“ – to běše tema zabawneho programa dokoławokoło serbskeje erotiki we wobłuku sobotnišeho wječora IX. Mjezynarodneho folklorneho festiwala 09.07.2011 w Chrósćicach.
Někotryžkuli přihladowar drje njewočakowaše, zo póńdźe přez hodźinu wo knyskotatu erotiku. Direktnosć programa pak bu hižo po prěnim wustupje moderatorki wječorka Andreje Rjedźić jasna. Najpozdźišo, jako wotposka wona swój přijimowak, so posledni starši z dźěćimi z pedagogiskich přičin radšo zminychu. Prěni hosćo programa běchu zrališi mužojo „Spěwneho consortiuma seniorow“, kiž zanjesechu na žortne wašnje znate melodije z tróšku změnjenymi tekstami połnych schowaneje erotiki. Přizamkny so wuběr serbskich erotiskich basnjow, kiž přednjese sporno... eh społnomócnjena za serbsku erotiku. Na kóncu žadaše sej wona samo Swjate pismo, zo by z njeho erotiske teksty čitała (štóž nam to njewěri, njech pohlada sam do „Pěsnje pěsnjow“, kiž namaka w najnowšim serbskim wudaću Swjateho pisma na stronje 738).
Wjeršk programa bě bjezdwěla erotiska reja Julije Wollmannec a Jurja Šimana po choreografiji Constanzy Wendisch. Po znatych ludowych melodijach, kiž bě Tasso Schille z NSLDź aranžował, zawjedźe młoda domjaca so wostudźaceho pachoła. Hudźbnje dźěše dale ze solo-wustupom Lydije Jaworkec, kiž předstaji nowej spěwaj „Schil so ke mni“ po basni Jana Skale a „Zady našoh kompeja“ ze swójskeho pjera.
Slědowachu na 200 přihladowarjow program dotal bóle pasiwnje, steješe w přichodnym čisle publikum sam w srjedźišću. Dźěše wo to, štó přednjese předpodate hrónčka najbóle erotisce. Dobyćerka bě knj. Nawcyna z Chrósćic.
Posledni dypk bě nowy telewizijny format „Erotika 5 do dwanaćich“, hdźež outwaše so Ćopły Jurij jako bi – potajkim bikulturny. Finale bě serbska wersija znateho spěwa „Je t'aime“ z finalnym wuprajenjom „Lubujće so, rozmnožće so – za naš lud kraj!“.
Zwuki erotiskeho programa
Telefonowy přijimowak Horceje Lucije:
Medley z najlěpšimi wurězkami:
Serbska wersija spěwa »Je t'aime«:
Serbska wersija spěwa »Je t'aime« (CD-kwalita; 2,5 MByte):
