28.06.2010

»Pawčinu złósće« rozpletli

Alina Kóskec a Kornelius Lankuš staj mordarja Heddy Olsen wotkryłoj. A to njebě zawěrno tak lochko. Připosłucharjo a čitarjo našeje 3. swjatojanskeje nocy w Hornim Hajnku přepytachu zhromadnje Budarjec ležownosć za slědami: wot wohenja, přez pozdatny kěrchow, kuchnju, garažu, biblioteku, balkon, dźěłarnju, haj samo do Berlina smy sej wšitcy wirtuelnje dojěli.

> někotre fota čitanskeje nocy

Kaž widźiće (a w zwukach dale deleka slyšiće), smy so při lětušim čitanju na kombinaciju zašłeju swjatojanskeju nocow w Hornim Hajnku zwažili. Smy literarisku předłohu scenisce čitali a po městnach jednanja pućowali. Při tym smy wězo na to dźiwali, kotre sceny we wsy hraja - te smy tak rjec live čitali. Druhe pak, kiž so w měsće w bibliotece, na komisariaće, pola sudniskeho medicinarja abo w Berlinje wotměja, smy do toho na CD natočili.
Młodu komisarku Alinu Kóskec čitaše Hanka Markec, jeje šef Kornelius Lankuš bě Tomaš Delenk. Lydia Jaworkec požči swój hłós spłóšiwej hospozy knjeni Nowakowej a Franciska Rachelina čitaše rólu korčmarskeje dźowki Anje Šołćic. Andreja Wałdźic rěčeše młodu fotografku Carolu Matkec w Berlinje. Jan Budar wustupowaše jako kriminalny technikar Fryča a jako Jan Matka. A dokelž ma na našich zarjadowanjach wšo tež wěsty improwizowany raz, dyrbjachmy při rozdźělenju dalšich rolow - kiž smy za syły zajimcow hač do poslednjeho wokomika njewobsadźene dźerželi - kuzłać. Michał Cyž bě potajkim sudniski medicinar Krawža, Gerat Matka, Hejduška a muž za wšě zwukowe a wobswětlenske překwapjenki. Jemu słuša wosebity dźak a čestne městno na literarnym konopeju. Madleńka Šołćic wjedźeše připosłucharjow jako powědarka wot městna k městnu a spožči připódla tež knjeni Matcynej a kónzumowej Hanušowej žiwu postawu. Tule namakaće zwuki ze scenow zwonka Lejnic.

Komisar Lankuš zazwoni swoju nowu koleginu Alinu Kóskec.