14.03.2010
Ryma ryma rej ...
to běchu naše 2. narodniny
Haj, štóž we Wotrowje njebě, je na kóždy pad rjany wječor skomdźił. Z ekskluziwnym čitanjom anagramow Róže Domašcyneje wječor spočinachmy. Potom podachmy so na pućowanje po rumnosćach kluba, wot čitanja k napřemorymowanju młodych přećiwo hišće młódšim, k wuhódanju wobrazowych a rymowanych hódančkow na chódbje - hdźež bě cyły publikum prašany - hač k dalšemu wjerškej wječora, wurisanju "Pismawučeny 2010". Wonu hru doby skoro Clemens Škoda, kiž bu wot wučerja serbšćiny Měrka Pohonča přetrjecheny. Wječor zakónči so z prěnjej serbskej poetry slam - z wubědźowanjom w spontanym basnjenju. Publikum na kóncu z aplawsom rozsudźi, kotra baseń so jemu najlěpje spodoba. Literarny konopej a jeho team so dźakujetaj wšěm sobuskutkowacym: Róži Domašcynej za čitanje a dohlad do anagramowanja, Markej Njekej jako moderatorej; Michałej Cyžej, kiž wšo natočeše, Istvánej Kobjeli a Rjezce, Bernadet a Julianej za rjanu hudźbu, Benej Budarjej za přewostajenje literarnych mytow, Andreji jako asistencce, Romanej Grzybej za prezentacisku taflu, farajej Dawidowskemu za pult, Marekej, Florianje a Clemensej za zabawu. Nimo toho słuša dźak našim partneram: O2 (Wotrow), LND, NSLDź. a MDR. A nětko dajće sej impresije wo wječoru lubić.
