21.06.2009
Mordar wotkryty, woheń hasnjeny
Štó by sej to myslił? To sej w najkrótšej nocy lěta (20.6.09) tón abo tamny na našej druhej čitanskej nocy w Hornim Hajnku mysleše. Mordar wosta za wjetšinu přitomnych hač do posledneje sceny zakryty a eksperiment live-režije je so poradźił. Nimale 30 ludźi bě tež lětsa zaso puć do zanjeseneje wjeski namakał a so sobu na dyrdomdej zhromadneho čitanja podał.
Dotal njesłyšany bě naš eksperiment, na jeničkim wječoru – bjez proby – kriminalnu hru čitać. Do toho smy róle zajimcam připósłali, wězo jenož jich tekst, tak njeznajachu ani wukónc hry ani swojich „sobuhrajacych“. Z tym bě podawk za čitacych kaž tež za připosłucharjow napjaty hač do kónca. Wjedro bě na tymle wječoru wulkotne, kołbaski – wot awtorki Hanki spražene – wuběrne, wino słódne a rozmołwa zajimawa – hač do napoł třoch. Jeli chceće wědźeć, što sće skomdźli, klikće tule.
> někotre fota čitanskeje nocy
Tu móžeće sej sceny, kiž njejsu so live čitali, ale z computera zahrali, naposkać. Su to sceny, kiž leža zwonka hłowneho jednanja. Za to pak su čim zajimawše, dokelž wotmějetej so prěnjej scenje krótko do njeskutka – zabiwanje wšěch swójbnych – a trěća scena je wuznawanje mordarja.
1) Wowka a wnučka: [ download jako mp3 ]
2) Dźěd a wowka: [ download jako mp3 ]
3) Wuznaće mordarja: [ download jako mp3 ]
Wězo změjemy tež klětu zaso čitansku nóc – wo wšěch druhich wažnosćach was wězo tež na našej stronje informujemy.
Zo byšće wědźeli, štó ći zmužići našeho wječora běchu, tule jich mjena. Wutrobny dźak wšěm akteram a Michałej za jeho inspiratiwnu techniku.
„Za Šmrěkami“, adapcija wot Hanki Markec na roman „Tannöd“
Danarjowa – Marja Kubicowa
Danar – Měrćin Słodenk
Madleńka – Milena Hrjehorjec
Marja Šćěpina, burowka – Judit Markec
Jan Šćěpa, bur – Guido Budar
Alojs, jich wotročk – Dušan Šołta
Mać Hańžki – Hanka Pawlikec
Hana Błažikec, předawarka – Andreja Wałdźic
Herta Natuškec, hospoza fararja – Mónika Šěnec
Trudla Krygarjowa, sotra zabiteje słužowneje – Jadwiga Kaulfürstowa
Wučer – Jan Budar
Listonoš – Tomaš Delenk
Klaws, monter – Fabian Kaulfürst
Chortnik – Jurij Šiman
Hana, něhdy słužowna pola Danarjec – Hanka Markec
Farar – Michał Cyž
režija – Madleńka Šołćic
zwuk a swěca – Michał Cyž
