03.06.2009
Štó je mordar „za šmrěkami“?
… rěka prašenje w najkrótšej nocy lěta. Literarny konopej přeprošuje na swoju druhu čitansku nóc, 20. junija 2009, wječor napoł dźewjećich do Hornjeho Hajnka. We wjesce, w kotrejž je nocy „ćma kaž w pjecy“, chcemy z Wami zhromadnje čitajo při wohenju za mordarjom pytać. Hanka Markec, studentka dźiwadźelenja, je napisała serbsku hru wo krawnym njeskutku w domje „Za Šmrěkami“ (po přikładźe němskeho romana „Tannöd“). A što hewak, hdyž nic literarny konopej so za čitanje tajkeje ekskluziwneje předłohi poskića?
Čitanje při wohenju je tak rjec serbska prapremjera a zdobom eksperiment za Hanku, hač je so jej tekst zešlachćił a to snano samo jako „słuchohra“. Potajkim čitajće z nami na tutej soboće a zmužće so!
Prašani a pytani – su nimo mordarja ;-)) - sobučitacy, to rěka: wy! Štó čita sobu? Napisajće nam hač do 10.06. mailku na , chceće-li sobučitać a my wam waš tekst připósćelemy. Žadyn strach, z hłowy móc jón njetrjebaće, jenož raz doma čitajo přihotować ;-)) Dóstanjeće tak a tak jenož wašu rólu, to rěka njeznajeće druhich. To so hakle na wječoru wujasni pod „live režiju“. Potajkim hišće jedyn eksperiment – to tež hišće ženje dawało njeje! Tule namakaće lisćinu wosobow, kiž chcemy wobsadźić:
Marja Šćěpina, burowka
Jan Šćěpa, bur
Alojs, jich wotročk
Mać Hańžki
Hana Błažikec, předawarka
Herta Natuškec, hospoza fararja
Trudla Krygarjowa, sotra zabiteje słužowneje
Wučer
Listonoš
Klaws, monter
Chortnik
Hana, něhdy słužowna pola Danarjec
Farar
