Temporalna wjazawka

Hdyž prěni wukřik w jaskrawym swětle płuca zaswěći,

Hdyž kóčka před přismalacej wobruču sej swoje šansy wuwědomi,

Hdyž kulka ze Smitha a Wessona synapsy mjez mozami roztřěska,

Hdyž jenička kročel lawinu wottorhnje a žiwjenja pohrjeba,

Hdyž pruwowanske prašenje zmysł wuknjenja ad absurdum wjedźe,

Hdyž pohlad do luboznych woči runja medusy wěčnje puta,

Hdyž stłóčenje na zahibak posměwk a sylzu skamjentni,

Hdyž kop do wrotow hurra abo płač a křipjenje zubow zawostaji,

Hdyž proste Ně pak rjap ći skrući pak rewoluciju zrodźi,

Hdyž so w ekstatiskich wyšinach škit z gumija njejapcy torhnje,

Hdyž kapki na čoło bjezmócneho kazaja, do čoh’ ma wotnětka wěrić,

je lědma wokomik zašoł.