Slepjanske pěsnjeKóždu nóc dźije so mi, zo sy ty spała při mni … Lětko stoji ta woda tam, hdźež k tebi ja dźěch, judahej.
Myjach sej lico a w hłubokosći widźach štom Rjana róža, widźach štomaj Nalika, Muškota, widźach třeći štom Jědojte jabłučko. Pod nim třo hólcy hołbje pasu. Při nim je holičo šło trawku žněć.
Přestrěj swój płašćik, přiwjazany za lipu je kóń.
Tam, praji šapar, w pjeńku dubowym dźěćo leži, přikryte z ćernjom. A Kito, z karu łučwa sem z hole, chichotacy: Daj mi jedno jajko – sydom lět dyrbjach wandrować, na fórmowanskej dróze lubku zhubich, naša rola leži pusta.
Ale kóždu nóc dźije so mi, zo sy ty spała při mni … Lětko stoji ta woda tam, hdźež k tebi ja dźěch, judahej. |